(1954) Inviernu
-¿Qué fai güela 'llevantada? ¡Debía tar na cama ya! -Pásame meyor el tiempu si hay daqué que trabayar. -¿Filó munchu?
-Lo que pudi.
LoL que non... dexao tá. -Entós güela... güenes noches. -Güenes sean en santa paz.
Vase el nietu pal so cuartu. La güela pal suyu va. Queda la casa en silenciu. Neva 'fuera 'n sin cesar. El vientu xime tristeces que cuerren en sin parar. De vez en cuando, allá lexos, dai al llobu per aullar.
Mira el reloj la vieyina. Las once ya tán per dar. Siéntese, tovía lexos, un ixuxú retumbar, qu'arrebalgau so les sombres el ecu fáilu acercar, como anunciándoi que'l nietu non tardará'n allegar.
Una sonrisa'n sos llabios paez que se quier dibuxar. Iguase bien la toquilla. Arrecóxise'n el llar,
y con la rueca na mano fáise que güelve a filar, pa que cuando'l nietu allegue non lu'nfade so asperar.
Ya se sienten les madreñes llenes de firme pisar. Llevántase la güelina, pon la rueca en so llugar y acercándose a la puerte, con so menudín andar, descuerre la taravica
pa que'l nietu podia entrar.
Güelve otra vez a sentase. Per la puerte 'ntra el rapaz que acercándose a la gücla un besu 'na frente i da. Besu de paz pa la vieya que güena falta i fará pa calmai el sobresaltu, dándoi más tranquilidá.
Fai muncho friu. Tá ñevando. La lleña quema'n el llar. La vieyina tá filando al son-son d'algún cantar que lu lleven les tiniebles pa ocultalu'n un llugar onde se esmucien les coses que non se atopen xamás.
Siéntese lexos, muy lexos, de los llobos el aullar. Cuando'n inviernu la ñeve faise durecia al xelar, espuerre el llobu les pates, quei comiencen a'floxar, y emburriándolu, la fame, failu del monte abaxar.
Presinase la vieyina
y güélvese a presinar, mientres de sos llabios secos
salei baxín un rezar
per los que tán fuera casa, pos non dexa de pensar que cuando tien fame'l llobu non ye cosa de xugar.
La vieya dexa la rueca y atentes ponse a escuchar. Los soníos de la noche, con so triste mermurar, traen quexíos de xanes y dalgún qu'otru quexar. ¡Cuántes almes'n eses noches aprovechen pa falar!